IMERINTSIATOSIKA : Ravan’ny Zandary ireo tambajotran-jiolahy mpanao fanafihana

Ravan’ny zandary ny andian-jiolahy mahery vaika nampitondra faisana tany amin’ny Kaominina Imerintsiatosika sy ny manodidina iny, ny 17 oktobra lasa teo. Raha ny  nambaran’ny avy ao amin’ny Tobim-paritry  ny zandarimaria Imerintsiatosika dia nampihorohoro amin’ny resaka vaky trano sy fanafihana mitam-piadiana izy ireo. Tratra tamin’izany ireo entana isan-karazany ary sarona tao an-trano ny rongony 3 kg. Ankoatra ireo, mbola nahitana fitaovana toy ny basy poleta vita gasy iray  miaraka amin’ny bala  miisa sivy miampy tranom-bala miisa roa. Nanampy ireo ny  « barre à pince » sy antsilava, fampiasan’ireo jiolahy rehefa mamaky trano. Amin’ny maha fikambanan-jiolahy azy ireo, dia misy roa amin’izy ireo no mpamatsy bala. Mitohy hatrany ny fikarohana ireo mpiray tendro amin’ireto jiolahy any amin’ny faritra Imerintsiatosika sy Arivonimamo iny. Nomena baiko kaomandin’ny kaompania hanara-maso akaiky ny famotorana sy hampahafantatra mialoha  ny tomponandraikitra ao amin’ny  Fitsarana mikasika io asan-jiolahy sarona io.

Basy vita gasy 81 sarona…

Isan’ny mahatonga ny tsy fandriampahalemana ny fiparitahan’ny basy eny am-pelatanan’ny jiolahy. Mitohy hatrany ny  fanentanana tanterahina miaraka amin’ireo tomponandraikitra ifotony, tahaka ny solombavambahoaka, ben’ny Tanàna, sefom-pokontany,  ny amin’ny  famerenana ireny basy miparitaka sy tsy nahazoana alalana ireny.  Nisy, araka izany,  ny vokatra azo tao amin’ny Kaominina ambanivohitra Nasandratrony, distrikan’ Isandra. Noraisin’ny Kaomandin’ny vondron-tobim-paritry Matsiatra Ambony tany an-toerana ireo basy ireo ary natrehan-dRamatoa Depiote voafidy tao Isandra, izay mitsinjara ho toy izao. Basy vita gasy miisa 81 ka basilava ny 29 ary miendrika poleta kosa, ny 52.

Marihina fa nidera ny ezaka vitan’ny zandarimaria  ny depiote sy ny ben’ny Tanàna, indrindra ireo vahoaka. Nanome toky izy ireo fa hanohy hatrany ny fanentanana sy ny fiaraha-miasa. Na eo aza ireo vokatra ireo,   mbola nohamafisina hatrany ny fanentanana. Notsindrina mafy ny baiko ny amin’ny hampihorohorona ireo mpanao ratsy sy ny mpitsikombakomba amin’ izy ireo, indrindra ireo « Mpimasy « .