BUCAREST ROMANIA : Namiratra ny Zandary malagasy tamin’ny fandrantoam-pahalalana

Izy no Kap Andriambeloniaina Safidiniavo Toky, “Aide de camp”-n’Atoa Sekreteram-panjakana miadidy ny Zandarimariam-pirenena, ny Jly Ravalomanana Richard, nivoaka ho « Major de promotion » tamin’ny fiofanana nahazoana ny « Diplôme d’État-major de la Gendarmerie » tany Bucarest Romania. Manamboninahitra ambony sy manamboninahitra avy amin’ny firenena enina no nandray anjara dia Madagasikara, Romania, Ukraine, Mali, Tonizia ary Moldavie. Nivoaka avy tamin’ny andiany faha-35 ny Akademia Miaramila Antsirabe tamin’ny taona 2014 izy. Nianatra tao amin’ny Sekoly ambonin’ny Zandarimaria ao Moramanga ary nivoaka ho « Major de promotion » tamin’ny taona 2015. Niasa ho lefitry ny Kaomandina vondron-tombim-paritry ny Zandarimaria tao aorian’izay, ary efa nibaiko saiholafy hery vonjy (PMP) ihany koa. Nanaraka fiofanana ivoarana hahafaha-mibaiko kaompania sy “escadron de gendarmerie” tao amin’ny École des officiers de la Gendarmerie nationale (EOGN) tany Ouakam Sénegal ary nivoaka ho « Major de promotion » ihany koa ny taona 2017. Firenena 13 no voasolo tena tao tamin’izany. Voatendry hiasa tao amin’ny Sekoly ambonin’ny Zandarimariam-pirenena ny taona 2018 ary nampianatra “Police judiciaire” sy “Tactique”. Manana ny « Certificate of criminal security course » avy ao amin’ny « Département de la Police militaire » tao Egypte ihany koa izy. Voatendry ho “Aide de camp”-n’Atoa Sekreteram-panjakana miadidy ny Zandarimariam-pirenena izy nanomboka ny Janoary 2019.