Distrikan’i Mandritsara : Maty voatifitra Dezifôlaka, jiolahy raindahiny ikoizana

Ny alin’ny 30 aprily hifoha ny 1 mey lasa teo no voasambotry ny zandary tao amin’ny zana-tobim-paritra Ambohitsoa i Dezifôlaka, jiolahy raindahiny nampitondra faisana any Tsaratanàna, anatin’ny distrikan’i Mandritsara. Raha ny fampitam-baovao momba ity jiolahy ity, dia vao avy namita sazy tany am-ponja tao amin’ny fonjaben’Mandritsara izy, ny desambra 2020, ary dia namerina ny asa ratsy fanaony. Isan’izany ny fanafihana niseho ny faha 6 aprily sy ny 12 aprily tany an-toerana. Nandritra ny fanadihadiana, niaiky izy fa isan’ireo nandray anjara tamin’ireo fanafihana ireo, ary nilaza ireo mpiara-dia aminy, toa an-dry Roslin, Jajao, ary ry Leherihely, izay voalaza fa mipetraka ao Ambodimangahely, Kaominina ambanivohitra  Tsaratanàna, distrikan’i  Mandritsara. Omaly vao maraimbe,  nentina i Dezifôlaka mba entina hitadiavana ireo namany.             Teo amin’ny toerana antosina hoe Ambalanantsotry anefa, atsinanan’ny tanànan’i Ambodisely, fokontany Ambodimadiro, kaominina Marotandrano, niezaka nitsoaka i Dezifôlaka, nanararaotra ireo toerana somary kirihitra, mba hitsoahana.

Nisy, araka izany, ny tifi-danitra mba hanajanonana ity jiolahy raindahiny ity, saingy tsy nety nijanona. Vokany, voatery tsy maintsy nitifitra ireo zandary, ka lavo tamin’izany ity jiolahy raindahiny sady mpamerin-keloka ity. Nisy ny fepetra noraisina, nampandrenesina avokoa ny tomponandraiki-panjakana isan-tsokajiny tany an-toerana. Taorian’ny fizahana ny razana nataon’ny dokotera avy ao amin’ny CSBII Marotandrano, natolotra ny fianakaviany ny razana. Mitohy kosa, ny fikarohan’ny zandary any an-toerana ireo tambajotran-jiolahy niaraka amin’ity jiolahy Dezifôlaka ity. Velom-pisaorana tanteraka ny mponina any an-toerana amin’ny ezaka tanterahin’ny zandary, momba ny ady amin’ny tsy fandriampahalemana ao amin’ny kaominina ambanivohitra Tsaratanàna, anatin’ny distrikan’i Mandritsara.