FIONDRANANA AN-TSOKOSOKO : Olona 17 tra-tehaka tany Ambanja

Olona 17 saika hiondrana an-tsokosoko any Mayotte no saron’ny Zandarimariam-pirenena tany Ambanja, afakomaly. Raha ny angom-baovao, tao Ampasimbary Kaominina ambanivohitra Antafiambotry, distrikan’Ambanja, tany amin’ny faritra Ampasindava no nahitana ilay sambo haingam-pandeha, saika handehanan’ireto olona miisa 17. Niisa  20 ireto mpandeha saika hiondrana an-tsokosoko ireto, saingy ny telo tamin’izy ireo, tsy hita izay nanjavonany.  Efa nanome vola 4 hetsy sy roa tapitrisa Ariary isaky ny  olona, tamin’ireo mpitondra sambo haingam-pandeha. Efa azon’ireto mpitatitra an-tsokosoko ireto ny ankabeazan’ny vola. Raha ny fanadihadiana, 2.400.000 ariary ka hatramin’ny 300.000 Ar isan’olona no vola takin’ireo mpitondra sambo haingam-pandeha.

Ireo mpamily an’ity sambo ity sy ny mpanampiny antsoina hoe Wardo sy Jaonjara no tompon’antoka amin’izao fiondranana an-tsokosoko. Ireto farany, izay tafaporitsaka ary efa an-dalam-pikarohana. Vokatry ny vela-pandrika notontosain’ny zandary, izay notarihin’ny Luet Antrefinomenjanahary Solofo sy ny ekipany no nahazoana izao vokatra izao.  Tiana ny manamarika fa olona avy Mahajanga, Nosy-Be, Antsiranana ary Faritra Sava ireto olona nikasa ho any Mayotte ireto. Efa nogiazana ilay sambo haingam-pandeha sy ny maoterany. Efa mitohy ny fanadihadiana sy ny fikarohana azy ireo.