FOTODRAFITRASA, FAMPIANARANA, FAMBOLENA, … : Vonona hanatsara ny fiarahamiasa amin’i Madagasikara ny Banky iraisampirenena

Manohy ny asany andavanandro ny Fitondram-panjakana. Tsy lavina fa eo ny ambana lehibe noho ny mbola fisian’ny valanaretina Covid-19 eto amin’ny firenena, eo koa ny loza voajanahary izay miseho lany eto amintsika, fa ny fampandrosoana ny firenena koa tsy maintsy mandeha. Ankoatra ny fandraisana anjara amin’ireo fihaonana an-tampony iraisampirenena samihafa, mitohy mandray sy mihaona amin’ireo mpiara-miombona antoka eto an-toerana ihany koa ny Fitondram-panjakana, izay manamafy ny fiarahamiasa. Amin’izao fitsidihana ataon’ny solontena avy amin’ny Banky Iraisam-pirenena an’I Madagasikara izao, noraisin’ny Praiminisitra Ntsay Christian teto amin’ny Lapan’i Mahazoarivo ny Delegasiona notarihin-dRamatoa Idah Z. Pswarayi-Riddihough, Talen’ny fandraharahana eo anivon’ity mpiara-miombona antoka ity, mba hanomana ny dingana manaraka amin’ny fiaraha-miasan’ny roa tonta.

Nifanakalozana nandritra ny fihaonana ny momba ireo sehatra tokony hohatsaraina na hohafainganina eo amin’ny fiaraha-miasan’ny roa tonta, mba hahafahana mampandroso ny firenena. Ohatra tamin’izany ny resaka fotodrafitrasa, ny fampianarana , ny fahasalamana, ny fiahiana ny mponina, ny fitaterana, ny fambolena , ary ny mahakasika manokana ny faritra Atsimon’ny Nosy. Tsara ho fantatra fa efa nisy ihany koa ny fihaonan’ity delegasiona ity tamin’ny Minisitry ny Toekarena sy ny Fitantanam-bola, Rabarinirinarison Rindra Hasimbelo, omaly. Araka ny fantatra, hihaona amin’ny Filoham-pirenena sy ireo Minisitra  rehetra voakasiky ny tetikasa vatsian’ny Banky Iraisam-pirenena vola eto Madagasikara izy ireo mandritra izao diany izao.

Fanamafisam-piarahamiasa nataon’ny Filoha

Raha tsiahivina, tomponandraikitra ambony maro hafa ihany koa no efa nihaona tamin’ny Filohan’ny Repoblika nandritra ny diany tany Bruxelles farany teo, ho fanamafisam-piarahamiasa. Ny 16 febroary 2022 teo, nihaona tamin’i Jutta Urpilainen, Commissaire européenne aux Partenariats internationaux, tao amin’ny Siège de la Commission Berlaymont au Rond-Point Schuman, ny Filoha. Ny marainan’ny 18 Febroary 2022 kosa, nihaona manokana tamin’ny Filohan’ny BEI- Banque européenne d’investissement Werner Hoyer sy ireo Filoha lefiny Ambroise Fayolle sy i Thomas Ostros ary i Maria Shaw-Barragan ( Directrice pays partenaire, direction des opérations) niaraka tamin’i Sean Fitzpatrick (Chef du bureau du Président) ny Filoha Andry Rajoelina, nialohan’ny fivoriana an-tampony. Efa mpiara-miasa akaiky amin’i Madagasikara nanomboka ny taona 1970 ny BEI tamin’ny sehatra maro, araka ny fanazavana. Isan’izany ny fanamboarana ireo lalana an-drenivohitra, ny fanarenana ny toho-drano sy ny fampidirana rano fisotro madio ao Antananarivo ary ny sehatry ny fitaterana.