FAMPANARAHAN-DALANA : Nomena fe-potoana hatramin’ny 21 septambra ireo fiara « WW »

Nanatanteraka valandresaka ho an’ny mpanao gazety, ny avy amin’ny Foibe fitsarana fiarakodia, omaly teny Alarobia. Nambaran’ny Kly Rasambomanana Yvon Patrick Tale eo anivon’ny Foiben’ny fitsarana fiarakodia fa « tsy mitsaha-mitombo ny fiara mampiasa tsy ara-dalàna ny laharana « WW » na mitondra ny laharana vahiny avy any ivelany  noho ny tsy fahatomombanan’ny taratasin’ny fiara na ny tsy fisiany izany mihitsy, mba hialana amin’ny fanaovana « réception technique » na fitsirihina ara-teknika ilay fiara ka misy fiantraikany amin’ny fiarovana ny ain’ny olona sy ny fananany, ny fidiram-bolam-panjakana ary ny fitandroana filaminana ».  Raha ny fanazavana,  misy ireo mampiasa azy ireny hanaovana asan-jiolahy mihitsy.

Manoloana izany, nomena fe-potoana hatramin’ny 21 septambra izy ireo hikarakarana ny taratasin’ny fiara ho amin’ny ara-dalàna. Aorian’izay,   hisy ny hetsika manokana avy amin’ny Foibe fitsarana fiarakodia iarahana amin’ny mpitandro filaminana, amin’ny fanamafisana ny fanenjehana ny fandikan-dalàna, momba ny fampiasana ny laharana tsy ara-dalana « WW » sy ny laharana avy any ivelany.

Nentanina, araka izany, ireo mampiasa larahana tsy ara-dalàna, mba hanatona ny Ivontoerana fitsarana fiarakodia akaiky azy indrindra sy ny « Centre de réception technique » eny By-Pass Alasora ho an’ny eto Antananarivo, mba hikarakara izany ary tsy hisaraka amin’ilay rosia rehefa mandeha.

Fandikan-dalàna samihafa…

Miseho amin’ny endrika isan-karazany ny fandikan-dalàna momba ny fampiasana laharana tsy ara-dalàna. Tafiditra ao ny  fiara “bonne occasion” efa manana laharana avy any ivelany, nefa miafina ao anatin’ny laharana « WW » na mampiasa « attestation provisoire de circuler » alaina amin’ny mpitandro filaminana, izay tsy manana fahefana hanome izany. Marihina fa ny fiara vaovao novidina na niditra garazy tamin’ny “ concessionaire” ihany no afaka mampiasa ny laharana « WW », izay ao anatin’ny 15 andro. Tsara, araka izany, raha maka dika mitovy ny « réception technique » any amin’ny mpivarotra fiara ny mpividy ireny fiara vaovao ireny mandra-piandry ny fivoahan’ny « carte grise » satria raha ny marina dia tokony ho efa natao « réception technique par type » izy ireo vao azo amidy.

Ankoatra izay, ny fiara « bonne occasion » amidy na efa lafo, nefa mbola mivezivezy miaraka amin’ny « modele n°01 » lany daty iray volana. Misy koa fiara tokony hanana lanja mihoatra ny 3,5T, nefa manao hosoka mampihena lanja nialana ny « constatation avant dédouanement ». Fiara efa manana laharana malagasy, saingy mampiasa « WW » ary tsy manao fitsirihina ara-teknika. Hamafisina fa ny fanaovana « reception technique » eny anivon’ny Foibe fitsarana fiarakodia amin’ny alalan’ireo Ivon-toerana fitsarana fiarakodia manerana ny Nosy no anisan’ny fepetra takina ahafaha-mahazo laharana eny amin’ny « centre immatriculateur » na ho an’ny fiara vaovao izany na ho an’ireo fiara efa niasa.