FIHAONANA AN-TAMPON’NY “SADC” – 2025 : Hanampy an’i Madagasikara amin’ny fandraisana izany i Afrika Atsimo

Nanolotra ny taratasy manendry azy hiasa eto Madagasikara tamin’ny Filohan’ny Repoblika ny Masoivoho vaovaon’i Afrika Atsimo, Andriamatoa Khazamula Lawrence Chabane. Efa hatramin’ny taona 1992 no nisian’ny fifandraisana ara-diplomatika teo amin’ny firenena roa tonta ary mihamafy orina hatrany izany ankehitriny, araka ny fampitam-baovaon’ny Fiadidiana ny Repoblika. Noresahana nandritra izao fihaonana izao moa ny hanamafisana ny fiaraha-miasa amin’ny maha samy mpikambana eo anivon’ny Vondrona Afrikanina sy ny SADC an’i Madagasikara sy Afrika Atsimo. Zava-dehibe ny fifampizarana traikefa amin’ny fikarakarana fihaonana avo lenta toy ny fivoriamben’ny SADC, hoy ny Masoivohon’i Afrika Atsimo miasa eto amintsika. Hanolo-tanana an’i Madagasikara, araka izany, ity firenena ity amin’ny fandavorariana ny fihaonana an-tampon’ny SADC izay ho atao eto amintsika amin’ny taona 2025.

Tsiahivina fa sambany teo amin’ny tantara i Madagasikara no handray ny fitantanana ny Vondrona SADC. Ny Filoha Andry Rajoelina, Filohan’ny Repoblikan’i Madagasikara, no voatendry ho filohan’ny Vondrona SADC mandritra ny fe-potoam-piasana 2025-2026, voalohany indrindra amin’ny tantaran’i Madagasikara izany raha toa ka efa roapolo taona no naha-mpikambana an’i Madagasikara tao anatin’ity vondrona ity, araka ny fanazavan’ny Minisitry ny Raharaham-bahiny Rasata Rafaravavitafika.  Fanendrena izay nohamafisina nandritra ny fihaonambe faha-44 natao tany Harare, Zimbaboe, midika ho fankasitrahana ny fitarihana sy ny fanoloran-tenan’Andriamatoa Filoha Rajoelina, hoy hatrany ny fanazavana. Tafiditra anatin’ny “Troika”-n’ny SADC i Madagasikara ankehitriny, amin’ny maha firenena hitantana manaraka ny SADC azy.

Voaresaka nandritra ny fihaonan’ny masoivoho vaovaon’i Afrika Atsimo sy ny Filoha Andry Rajoelina omaly koa ny fiaraha-miasa eo amin’ny sehatry ny fiarovana ny sisin-dranomasina sy harena an-dranomasina hifandraisan’ny firenena roa tonta.