Fampanantenan’ny Filoha tao Ihosy : Tonga ny fanampiana ireo Masera miahy ireo sahirana

Araka ny fampanantenana nataon’ny Filohan’ny Repoblika, nandritra ny fandalovany nitsidika ireo Masera « Fille de la Charité » ao Ihosy, dia tonga afakomaly ny andiany voalohany amin’ny fanomezana avy aminy, ho fanampiana ireo Masera miahy ireo ankizy sahirana sy ireo vaofonja tsy misy mpiahy. Nisolo tena ny Filoham-pirenena nanolotra izany, ny Governoran’Ihorombe, Nomenjanahary André Tafita Sareine. Fotsimbary 6250 kg, menaka sakafo 180 litatra, siramamy 250kg, katsaka voatoto 600 kg. Miampy savony 10 baoritra, « gel désinfectant » 15 tavoahangy, arotava miisa 150. Nankasitrahan’ireo Masera mitantana ny Ivontoerana ara-tsosialy « Ste Catherine Labouré » ao Ihosy izao fanehoam-pitiavana izao. Mipaka amin’ireo tena mila azy ireto fanomezan’ny Filoham-pirenena ho an’ny Ivon-toerana ara-tsosialy tantanan’ireo « Soeurs Fille de la Charité » ao Ihosy ireto.

Mpianatra miisa  170 avy amina sekoly maro ao Ihosy no anokonan-dry Masera vary 100 kapoaka isan’andro ao amin’ny « cantine ». Voafonja tsy misy mpiahy, marary, Zokiolona,  miisa 100 eo ho eo, no omen’izy ireo sakafo masaka intelo isan-kerinandro. Nankasitrahan’izy ireo, ny Filoham-pirenena, izay nitsinjo manokana azy ireo. Ankoatra ny fanampiana notanterahin’ny Filoha, tany an-toerana, dia tsy latsa-danja koa ny nataon’ireo Fikambanan’ny mpiompy omby sy mpivarotra ary mpihirakely (F3M) ho fanampiana ny mpiara-belona. Nanome ny anjarany ho fanasoavana ny mpiara-belona. Arotava miisa  500, savony 24 baoritra, « gel désinfectant » 36 tavoahangy, gazoala 150 litatra. Ireo mpandraharaha omby mivondrona ao amin’ny F 3M avy ao Ihosy, Betroka, Benenitra, Fotadrevo, Berenty, Matsiatra Ambony sy Antananarivo no nahazoana ireo. Nankasitraka azy ireo ny Goverinoran’Ihorombe, tamin’ny anaran’ny CRCO Ihorombe.