FANDRIAMPAHALEMANA SY FIAROVANA HO AN’NY TANORA: Mandray ny Fihaonambe Ministerialy faha-4 ao amin’ny Comesa i Madagasikara

Mandray ny Fihaonambe Ministerialy faha-4 momba ny fandriampahalemana sy ny fiarovana ho an’ny tanora anatin’ny vondrona Comesa i Madagasikara ny 3 hatramin’ny 6 desambra ho avy izao. Nandray anjara tamin’ny fanokafana ofisialin’ity fihaonambe iny Andriamatoa Kola Emi-Haulain, Sekretera Jeneralin’ny Minisiteran’ny Raharaham-bahiny. Naneho ny fisaorany izy amin’ny fandraisan’anjaran’ireo mpandray anjara rehetra, anisan’izany ny solontenan’ny mpiara-miombon’antoka iraisam-pirenena, ary ny fikambanana isam-paritra, ary nanamafy ny fandraisan’anjaran’i Madagasikara amin’ny fanohanana ny zon’ny tanora.
Tanora no isan’ny be indrindra amin’ny mponina anatin’ny firenena mandrafitra ny Comesa, izay miatrika olana maro toy ny tsy fananan’asa, ny tsy fitoviana eto amin’ny lafiny sosialy ary ny fifindra-monina tsy voafehy. Nanamafy i M. Kola fa ilaina maika ny fanekena ny tanora ho mpandray anjara fototra anivon’ny sehatra marolafy mifototra amin’ny fampandrosoana.
Ny tanjon’ny fihaonambe dia ny hahafahana mametraka drafitra mazava ho fampidirana ny tanora amin’ny seha-panapahan-kevitra. Madagasikara dia mamporisika hatrany ny tanora rehetra handray anjara feno amin’ny fampandrosoana ny fiarahamonina.

Nangonin’i LR.