FIFANINANANA LITERATIORA AN-TSORATRA : Hatonta ho boky ny asa soratry ireo mpandresy voalohany

Fanoratana sombin-tantara, tantara foronina ary amboarana tononkalo nanaraka ny lohahevitra « Tagnamaro », « Iray ihany isika », « Asa sy Ezaka », fepetra voalohany notakiana tamin’ny mpifaninana tamin’ny fifaninanam-pirenena ho an’ny literatiora an-tsoratra malagasy. Samy nakana ny mpandresy telo voalohany ireo sokajy telo  ireo. Nahazo tombony  tamin’ny mpandresy ireo mpifaninana nibata ny laharana voalohany. Manana ny fahafahana hanonta ny asa sorany izy ireo, izay iandraiketan’ny eo anivon’ny Minisiteran’ny Serasera sy ny Kolontsaina ny famoahana izany ho boky, raha ny nambaran’ny minisitry ny Serasera sy ny Kolontsaina, Lalatiana Rakotondrazafy Andriatongarivo. Notolorana loka maro ny mpandresy, tahaka  ny Raikibolana malagasy, boky momba ny ohabolana malagasy, ny  boky momba ny « Ny Fiandohan’ny Malagasy », ary ny boky Takelaka voavaofy. Marihina fa tsy nifidy taona ity fifaninanana  ity. « Irariana ny hampiharina amin’ny fiainana andavanandro ny fanandratana ny teny malagasy », araka ny nambaran’ny Minisitry ny Serasera sy ny Kolontsaina Lalatiana Rakotondrazafy Andriatongarivo tamin’ny kabary nataony. Lahateny izay namarana  ny « Iray volan’ny  teny malagasy » omaly, tetsy amin’ny Ivokolo Analakely. Araka ny nambarany hatrany, ny volana Jona no mifarana, fa mitohy kosa, ny fanaovana ny ranty ao amin’ny tambajotran-tserasera momba ny fanomezana ireo voambolana malagasy tena izy, ny fanohizana ny fandaharana mifandraika amin’izany ao  amin’ny TVM sy RNM. Ankoatra ny fankalazana ny « Iray volan’ny teny malagasy », niompana koa tamin’ny fandaharana fampiroboroboana ny teny, fandaharana fanabeazana olom-pirenena vanona ity volana ity tao anatin’izany, izay iandraiketan’ny eo anivon’ny Minisiteran’ny Serasera sy ny Kolontsaina. Nampiavaka ny fankalazana ny « Iray volan’ny  teny malagasy », tamin’ity  taona ity koa izany.

Mpifaninanana telo voalohany isan-tsojakiny                

« Harena lehibe ho an’ ny Firenena ny fanomezana lanja ny soratra », raha ny nambaran’ny solontenan’ny Vondron’ny mpitsara,  Iharilanto Patrick  Andriamangatiana. Ireo mpandresy telo  voalohany amin‘ny sombin-tantara: Razanajatovo Andrianimerina Hobiana,  Ramboanomentsoandrainy Max Edmond, Natioranomena  Narda. Momba ny tantara foronina indray: Randriamanalina Rova Mamitiana Hubertin, Randriamidosy Jean Bosco, Rafetinirina Georgette. Mahakasika ny amboarana tononkalo indray :  Rakotondraibe Andry Lalaina, Rahariniaina Mamiarilanto Léonie, ary  Ramanantenasoa Noëline.

Asa soratra nibata ny amboara

Araka ny nambaran’ ireo mpandresy sy nahazo ny laharana  voalohany  tamin’ny sokajy sombin-tantara sy tantara foronina,  nisy ny sedra nolalovana ary tsy mora ny fanomanana ny fifaninanana.   Nahazo ny laharana voalohany ny sombin-tantara mitondra ny lohateny « Nofy tsara, nofy ratsy », nosoratan-dRazanajatovo Andrianimerina Hobiana. Tantaram-pitiavana milaza ny fiarahan’olon-droa tsy afa-miaraka noho ny fady mipetraka amin’ny foko fiaviany, sy ny fanakavakavahana ary ny fiantraikan’izany eo amin’ny toerana iharany. Mahakasika ny tantara foronina kosa, nahazo ny laharana voalohany, ny tantara mitondra ny lohateny «   Ody faty ». Tantara  milazalaza ny  trangam-piainana tany amin’ny Faritra Maroantsetra sy Vohipeno, ary  ny sedram-piainana. Araka ny nambaran’ny tantara, singa telo ny mandrafitra izany ody faty izany, ny hasin’ny tany, izay tena mbola tandrovan’ny Faritra Antemoro, ny hasin’ny teny, izay  sady mamelona no mamono, ny fihavanana sy ny firaisankina ary ny  fitiavana.

Ranto Mamitiana