KolontsainaSongadim-baovao
FITANTANANA NY ZON’NY MPAMORONA : Afaka miditra amin’ilay rindram-baiko vaovao ireo mpanakanto manomboka ny 01 Jolay
Hampanarahana ny lafiny nomerika ny fomba fanisana ny fandehanan’ny hiran’ny mpanakanto sy ny mpamorona eny anivon’ny haino aman-jery rehetra manomboka ny 01 Jolay ho avy izao. Ho raiketina ao amin’ilay rindram- baiko « Manoova » ny anarany sy ny hirany hahafahany manara-maso mivantana sy ny mikajy ny vola tokony hiditra amin’izy ireo isam-bolana. Manomboka amin’io daty io ihany koa ny fahafahan’ny mpanakanto misoratra anarana ao anatin’izany rindram-baiko izany.
Izay mpanakanto na mpamorona misoratra anarana ao amin’ilay rindram-baiko (logiciel) « Manoova » ihany no afaka misitraka ny vola omen’ ny Office Malagasy du Droit d’Auteur (OMDA) isam-bolana, miankina amin’ny fiverimberenan’ny hirany mandeha amin’ny fahitalavitra na onjam-peo rehetra, raha ny fanazavana. Tombony ho azy ireo ny fanatanterahana izany hahafahany manara-maso ny fizotry ny sanganasa sy mijery ny habetsaky ny haino aman-jery sy ny trano fisotroana (bar) ary ny trano fihirana (karaoke) mandefa ny hirany. Hampanarahana ity tetikasa vaovao ity ihany koa ny fandraiketana an-tsoratra ireo karazana fampisehoana rehetra. Azon’ireo mpanakanto atao ny manatona mivantana, misoratra anarana, manomboka ny Zoma 01 Jolay ho avy izao etsy amin’ny Tranombokim-pirenena Anosy, ao amin’ny efitrano Gisèle Rabesahala. Azo atao koa ny miditra mivantana sy misoratra anarana ary mametraka ny hira ao amin’ilay rindram-baiko anabaka (en ligne).
Hira eny amin’ny tambajotran-tserasera
Manoloana ny fandehanan’ny hira eny amin’ireny tambajotran-tserasera ireny izay tsy andraisan’ny mpanakanto vola hatramin’izay, toy ny « youtube », dia nilaza ny Minisitry ny Serasera sy ny Kolontsaina, omaly, fa hisitraka mivantana ny zo tokony hisitrahany izy ireo, raha toa ka nisoratra anarana ao amin’ilay rindram-baiko. Ny fiarahamiasan’ ny Minisitera sy ny label international Universal Music sy Virgin Music, orinasa lehibe eo amin’ny sehatry mozika no nahatontosana izany.
Lamina apetraka hialana amin’ny hosoka
Amin’ny fotoana hahatongavan’ny mpamorona na mpanakanto eny anivon’ny OMDA, apetraka ny antontan-taratasy mahakasika ny tiany hahatongavana amin’ny sanganasany. Izany hoe, raha tarika no misy ilay mpamorona, azony atao ny milaza amin’ny fanomezana ny zony any amin’ilay namorona ny hira. Raha toa izy ka mpandika ny hira nahazo alalana, dia miverina any aminy ny vola. Hisy ihany anefa ny fanarahana maso hialana amin’ny fisandohana, raha ny fanazavan’ny Tale Jeneralin’ny Orinasa « Manoova » Rajaonarivelo Rajosoa Andriantseheno.
Fampiroboroboana ny tontolon’ny kanto
Azon’ny mpanakanto atao ny mametraka ny sanganasa anabaka (en ligne), raha toa ka efa niova ho nomerika ny hira. Azon’ny mpamorona na ny artista atao koa ny mitondra ny sanganasany izay voaraikitra any anaty kapila mangirana, USB, sy ireo karazana fitaovana maro hafa ary havadika ho nomerika. Tsara ho fantatra fa tsy hampiova ny kalitaon’ny hira ny fanovana ho nomerika.
« Fanovana eo amin’ny zon’ny mpamoroana, fampiroboroboana ny tontolon’ny kanto, drafi-panaovana ny zon’ny mpamorona ny fidirana amin’ity tontolon’ny nomerika ity », araka ny nambaran’ny Minisitry ny Serasera sy ny Kolontsaina Lalatiana Rakotondrazafy Andriatongarivo.
Natao omaly Talata 21 Jona ny fifanaovan-tsonia eo amin’ny Minisitera sy ny Tale Jeneralin’ny Orinasa « Manoova » ho mariky ny fiarahamiasa.
Ranto Mamitiana (Mpianatra asa).
