« Fiarovana ny zon’ny ankizy sy ny tanora niharan’ny herisetra ara-nofo », tetikasa izay nentin’i Antsaly Rajoelina ny maha oliravina (miss) azy tamin’ny fifaninanana « Miss Madagascar » ny volana Aprily teo. Anisan’ny antony nosafidianany ny lohahevitra ny zava-nisy nihatra taminy fony izy zaza, izay nahatsapany fa mendrika ny arovana ireo olona niharan’ny herisetra fa tsy vitan’ny raharaham-pihavanana fotsiny. Ho entiny indray, araka izany, ny faneva malagasy eo amin’ny sehatra iraisampirenena amin’ny fampahafantarana sy ny fanamafisana ity lohahevitra ity. “Io no tetikasa amin’ny asa sosialy izay ataony ao anatin’ilay « Beauté pour cause » amin’ny fifaninanana iraisam-pirenena « Miss Monde », ary hitsarana ihany koa ny mpandray anjara rehetra”, hoy ny fampitam-baovaon’ny Minisitera tomponandraikitra omaly. Ny volana Desambra ho avy izao no hanomboka ny fifaninanana Miss Monde.
« Vonona hatrany ny Minisiteran’ny Serasera sy ny Kolontsaina, manohana ireo tanora malagasy mitondra avo ny voninahi-pirenena malagasy any ivelany tahaka ny fahavononan’ireo oliravina misafidy tranga iray ho tohanana », raha ny fanambarana nataon’ny Minisitry ny Serasera sy ny Kolontsaina, Lalatiana Rakotondrazafy Andriatongarivo.
Tovovavy 23 taona i Antsaly Rajoelina, nanaraka ny lalam-piofanana momba ny Fitantanana orinasa ( Administration d’entreprise) izay nahazoany ny mari-pahaizana lisantsa. Mpanao fanatanjahantena izy. Efa tompondakan’i Madagasikara ny tenany ary nahazo ny laharana faharoa tamin’ny fifaninanana hazakazaka.
Tsiahivina fa nisalotra ny maha oliravina 2022 azy i Antsaly Rajoelina, solotena amin’ny Faritra Analamanga ny Alatsinainy 18 Aprily 2022. Manaraka azy kosa ireo tovovavy avy any amin’ny Faritra Fitovinany sy Faritra Boeny. Tsy niompana fotsiny amin’ny fitsarana ny hatsaran-tarehy ny fifaninanana. Anisan’ny fepetra takiana amin’izany ny fananana tetikasa hanasoavana ny mpiara-belona sy ny fahaizana manohana izany, ny fandresen-dahatra amin’ny fitondran-tena miaraka amin’ny mpifaninana.
Ranto Mamitiana (Mpianatra asa).
